Arrepentirme podería ser algún tipo de arte

Unha nova ciencia
pode ser un trauma máis
cando xa todo tende a ser un trauma máis.

A feira abre as súas portas
e mantén cada corolario
dictado dende as nubes.

Unha nova ciencia para entender
cada dedo anárquico
co que me sinalas
dende milleiros de aspectos
e matices.

A feira abre as súas portas
e mantén orgullosa
o seu novo teorema
co que pretende
dictar sentencia.

A amizade é de sal.

O amor é de sal.

A dor é de sal.

O sal dicta teoremas.

E nós tomamos notas,
pero non entendemos nin a nosa letra.