Arrepentirme podería ser algún tipo de arte

A que tamén te preguntas por que sigue existindo este blog?

Roberto Ríos tamén se fai a mesma cuestión.

Roberto Ríos era, basicamente, calvo. E xogou no Bilbao F.C. e no Sevilla Balompié Bético.

A semana pasada, nun pequeno pero amplo piso dúplex, Roberto Ríos levou á súa muller até o éxtase máis estremo ao ensinarlle algo que levaba anos ocultando.

Roberto Ríos tiña o seu pulmón esquerdo metido dentro dunha pequena caixa amarela que mercara no Senegal.

Senegal é un país e tamén ten unha capital.

Roberto Ríos pregúntase como é que sigue existindo este blog pero a Roberto Ríos patínalle a memoria.

A Roberto Ríos patínalle a memoria pero gústalle moito a expresión "patinar a memoria".

A filla menor de Roberto practica patinaxe artístico e dá voltas no aire. Non moitas, pero ao mellor si.

A filla menor de Roberto tense fixado en Carlos, o primoxénito do matrimonio entre Susana Marcos e Ignacio Monterroso. Con "tense fixado" querémonos referir a que a filla menor de Roberto, á que chamaremos Catuxa, aínda que o seu nome sexa Francisca, se sinte lixeiramente atraída por el.

O matrimonio Marcos-Monterroso está, fundamentalmente, cuberto de merda.

Catuxa sábeo, e de aí as súas dúbidas sobre a capacidade reprodutora de Carlos, aínda que o excremento matrimonial no que se ten convertido a unión entre Susana e Ignacio (Nacho para os amigos e achegados) non debería ter que ver con este aspecto, nin coas novas interpretacións da Poética aristotélica.

Roberto Ríos e a súa muller non saben nada sobre o estraño namoramento no que está sumida a súa filla e, senembargo, pensan invertir nunha preciosa posesión terreal ao sur do estado luso.

En resume, Roberto Ríos é calvo e non lle gustan as tortillas con cebola. Pero, amigos e amigas, a quen lle gustan hoxe en día?